[EDITORIAL] Falling out of love with Madam Vice President

Maraming quotable quotes sa dalawang oras na rant ni Bise Presidente Sara Duterte noong Biyernes. 

• “Hindi ko kasalanan that we are on this road to hell.”

• “They can drag me to hell. Pag dating nila doon, ako pa rin ‘yung presidente ng impiyerno.”

• “Sinabihan ko talaga si Senator Imee (Marcos). Sabi ko sa kanya, kung hindi kayo tumigil, huhukayin ko yung tatay ninyo, itatapon ko siya sa West Philippine Sea.”

• “Pangarap ko magkaroon ng effigy na sinusunog.”

Lahat may opinyon sa mga patutsada ni Sara. Desperate daw. Unbecoming of a vice president. May nagsasabing “diversionary tactic” o “deflection” ito upang pagtakpan ang isyu ng alleged misuse ng confidential funds niya.

Puwede rin itong tignan bilang smokescreen sa palpak na termino niya bilang Department of Education secretary kung saan hindi niya naibsan ang learning poverty. Reflected ito sa satisfaction ratings niya na dumausdos nang 19 percentage points matapos siyang mag-resign sa DepEd.

Pero so far, explosive na ang mga rebelasyon ng quadcom hearings na pilit tinatapatan ni Sara: si Senador at dating Philippine National Police chief Bato dela Rosa raw ang nag-coerce kay Kerwin Espinosa na mag-false testimony laban kay Leila de Lima; si Senador Bong Go ang umano’y bookkeeper at disbursing officer ng Davao Death Squad; at ayon kay dating Cebu police chief Royina Garma, ipinadron ni dating President Rodrigo Duterte sa DDS ang war vs drugs na ang engine ay isang rewards system — in other words: shoot to kill to earn.

Ano ang natabunan ng rant ni Sara sa mga nagbabagang balita?

• Pinuna ng mga mambabatas ang “expensive” na safehouses na nirentahan ng Office of the Vice President na umaabot sa P250,000 kada araw. 
• Inakusahan ang DepEd na pinamunuan ni Duterte ng pagmi-”mislead” sa COA nang sinabi nitong pinondohan nito ang Armed Forces of the Philippines youth summits gayong wala naman itong inambag sa gastos
• Dalawang high-ranking na DepEd official na ang nag-akusa kay Sara Duterte na namimigay siya ng envelopes na puno ng cash noong siya’y kalihim ng edukasyon.

Sabi ni Sara sa dalawang oras na mahaba niyang rant, “[Ano ang] pakialam natin sa kung ano’ng nararamdaman ng President at Vice President?” 

Kung meron mang tumpak siyang sinabi, ito na ‘yun: wala talaga kaming pakialam o simpatiya sa counter-quadcom act. Wala kaming pakialam kung “ginamit” ka ng mga Marcos noong 2022 — hindi ba’t willing participant ka sa pekeng unity? Wala rin kaming pakialam kung nagtampo ka dahil mas priority ng Presidente ang First Lady sa paggamit ng “air travel”. (Hindi ba’t talagang priority ang First Couple sa sasakyang panghimpapawid sa kahit na anong bansa?) 

Ayon sa research group na Octa, papataas at umabot na sa 38% ang mga Pilipinong nag-a-identify na pro-Marcos. Ang mga nag-a-identify naman na po-Duterte ay bumagsak sa 15%.

Pero lumaki ang hanay ng independent — 31% — habang ang undecided ay 11%. Kung pagsasamahin mo ang puwedeng pag-agawan ng lahat ng pampulitikang puwersa, ito’y nasa 42%.

Habang naiirita, natatawa, o nauuga ang mga Pilipino sa tila walang katapusang bangayan ng Marcos at Duterte — dumarami ang nae-alienate at dumidistansiya. 

Sana, ito na ang golpe de gulat na gigising sa mga Pilipinong sumasamba sa mga Duterte o Marcos. Ito na ang oras na kailangang may tumindig na makabuluhang pulitika na magbabalik ng tiwala ng taumbayan sa mga lider at institusyon.

So, Madam Vice President, read the writing on the wall, na ironically, isang prosesong maaaring ikaw ang nagpabilis. Tila naging accelerant ka sa falling out of love ng mga Pilipino sa mga Duterte. Baka kailangan mong i-fire ang PR handler mo. Irreverent at bastos — it works for your father. Pero tingin mo ba talaga, papatok sa Pilipino ang female version ni Digong?

Feeling namin, hindi na magtatagal at magkaka-effigy ka na. At kung talagang gusto mong “mag-presidente sa impiyerno,” go ahead. – Rappler.com